汤啸庵送客之后，寻思朱蔼人处所存有限，须和罗子富商量，即时便去兆富里黄翠凤家相访。罗子富正在楼上房里，请进厮见。适值黄二姐在座，也叫声“汤老爷”。汤啸庵点点头，道：“长远勿见哉，生意阿好？”黄二姐道：“生意勿局，比仔先起头悬迸哚。”黄翠凤冷笑叉口道：“耐是有生意勿做（口宛），啥勿局嗄！”
汤啸庵不解所谓，丢开不提，袖出房契给罗子富看，说明李鹤汀抵借一节。子富知其信实，一口允诺，当与啸庵同诣钱庄划付汇票。
黄二姐见罗子富、汤啸庵既去，房里没人，遂告诉黄翠凤道：“前日天看仔个人家人，倒无啥。我想就买仔俚罢。不过新出来，勿会做生意。就年底一节末，要短三四百洋钱哚，真真急煞来里。”翠凤低着头不言语。黄二姐道：“耐阿好替我想想法子，阿是进个把伙计？阿是拿楼浪房间租拨人家？”翠凤仍低着头，好似转念头样子。黄二姐揣度神情，涎脸央及道：“谢谢耐。耐说来浪闲话，我总归才依耐。倘忙生意好仔点，我也勿忘记耐个呀。谢谢耐，替我想想法子。”翠凤开言道：“耐个人忒啥个心勿足，故歇（要勿）说无法子，倘然有法子教拨耐，赚着仔三四百洋钱，耐倒再要嫌道少哉（口宛）！”黄二姐没口子分辨道：“故是无价事个。
有得赚末，再好无拨个哉。再要嫌道少，阿有该号人嗄！”
翠凤又低着头，足足有炊许时不言语。黄二姐亦自乖觉，静静的在旁伺候。翠凤忽睁开眼，把黄二姐相了一相，即招手令其近前，附耳说话。黄二姐弯腰楼背，仔细听着。又足足有炊许时，翠凤说话才完。黄二姐亦自领悟。
计议已定，恰好罗子富回来，手中拿的一包抵借契据，令翠凤将去收藏。黄二姐跟至床背后，帮翠凤撑起皮箱盖，怪问道：“罗老爷个拜匣有两只来里哉？”翠凤道：“一只是我个呀，赎身文书末就放来哚拜区里。”
子富听其重重关锁停当，黄二姐就辞别去了。翠凤鼻子里哼的一声，向子富道：“阿是拨我猜着，俚要向我借洋钱哉呀。”子富诧异道：“黄二姐再要借洋钱？”翠凤道：“俚个人末阿有啥淘成？两个月匆曾到，一千洋钱完结哉（口宛）。”子富随风过耳，亦不在意。
隔得一日，黄二姐复来，再三再四求告翠凤。翠凤咬定牙关，一毛不拔。黄二姐一连五日纠缠不清，翠凤索性不睬；黄二姐渐渐噪闹起来。子富看不过意，欲调和其间，不想黄二姐一口要借五百。子富劝其减些，黄二姐便唠唠叨叨，缕述从前待翠凤许多好处，道：“故歇会做仔生意，俚倒忘记脱哉！我末定归勿成功！赎身勿赎身，总是我个囡仵，阿怕俚逃走到外国去！”
子富接不下嘴，因将其言诉与翠凤。翠凤笑道：“有仔赎身文书末，怕俚啥嗄？随便啥法子来末哉。”
第五十八回终。
第五十九回 攫文书借用连环计 挣名气央题和韵诗
按：一日午后，黄二姐到了黄翠凤家，将欲噪闹。黄翠凤令外场喊两把皮篷车，竟和罗子富作明园之游，丢下黄二姐坐在房间里，任其所为。
及至明园泡下茶，翠凤还是冷笑道：“赎身文书来浪我手里，看俚再有啥法子！”子富道：“耐该应教个大姐陪陪俚。”翠凤头颈一扭道：“等俚歇末哉，啥人去陪俚嗄。”子富道：“勿局个囗。”翠凤道：“啥勿局，阿伯俚偷仔倪个家生？”子富道：“俚家生末勿要，赎身文书晓得来哚皮箱里，俚阿要偷嗄？”一句提醒了翠凤，登时白瞪瞪两只眼，失声道：“阿哟，勿好哉！”赵家(女每)在傍也是一怔，道：“划一勿好囗，倪快点转去罢。”
子富欲令翠凤先行，翠凤道：“耐末生来一淘转去，倘忙拨俚偷仔去末，也好替我商量商量。”当下三人各坐原车赶回家中。
一进家门，翠凤先问：“无(女每)阿来里楼浪？”外场回说：“刚刚转去，勿多一歇。”翠凤三脚两步，奔到楼上房间里。看看陈设器皿，并未缺少一件；再往床背后打一看时，这一惊非同小可。翠凤跺脚嚷道：“难末勿好哉呀！”
子富随后奔到，只见皮箱铰链丢落地上。揭开盖来，箱内清清爽爽只有一只拜盒。翠凤急的只是跺脚，又哭又骂，欲向黄二姐拚命。子富与赵家(女每)且劝翠凤坐下，慢慢商量。翠凤道：“商量啥嗄，俚是要我个命呀！我就死仔，难末俚有仔好处哉！”子富道：“耐末先拿我个拜区放好仔再说。”翠凤复从皮箱中取那只拜匣，别处收藏，忽然失惊打怪的喊道：“咿，倪只拜匣来里（口宛）！”既而恍然大悟道：“噢，俚拿差哉，拿仔罗老爷个拜匣去哉！”说着，呵呵大笑。子富听说，慌问：“我只拜匣阿来里嗄？”翠凤捧出那只拜匣给子富看，嘻嘻笑道：“俚拿差哉，拿仔耐个拜匣。倪拜匣末倒来里。”子富面色如土，拍腿说道：“难末真真勿好哉！”翠凤道：“耐只拜匣勿要紧个，俚拿得去也无啥用场。阿敢去变洋钱，俚也无拨场花好变（口宛）。”
子富呆想不语。翠凤乃叫赵家(女每)吩咐道：“耐去搭无(女每)说，该只是罗老爷个拜匣，问俚拿得去做啥？故歇罗老爷等来浪要哉，原教俚拿得来。”赵家(女每)答应而去。子富终有些忐忑惶惑。翠凤却决定黄二姐断无扣留不放之理。
一会儿，赵家(女每)回来，见了子富，先拍着掌笑一阵，然后复道：“故末笑话，俚哚还勿曾觉著拿差个呀，倒快活煞。我说是罗老爷个拜盒，难末刚刚晓得仔，呆脱哉，一声闲话响勿出。我末笑得来！俚哚教我带转去，我说‘勿管’就走。”子富跌足道：“嗳，耐为啥勿带仔来嗄？”赵家(女每)道：“俚哚拿得去个末，让俚哚自家拿得来。”翠凤接口道：“勿要紧个，晚歇定归来。”
子富像热锅上蚂蚁一般，坐不定，立不定，着急得紧。翠凤见子富着急，欲令赵家(女每)去催。子富止住，把高升唤至当面，令向黄二姐索取拜盒，并道：“耐闲话（要勿）去多说，就说我有事体，要用着个拜盒，快点拿得来带转去。”
高升领命，径往尚仁里黄二姐家。黄二姐见是高升，满面堆笑，请去后面小房间。高升日致主人之言，立等要那拜盒。黄二姐道：“拜盒来里呀，我要搭罗老爷说句闲话。耐（要勿）要紧，请坐囗。”高升不得已坐下。黄二姐喊人泡茶，从容说道：“耐来得正好。我有多花闲话来里，拜托耐去说拨罗老爷听。先起头翠凤来里做讨人，生意闹猛得野哚；为仔倪搭开消大，一径无拨多洋钱。翠凤赎仔个身末，勿好哉，生意一点也无拨，开消倒省匆来。一千洋钱个身价，勿知勿党才用完，难末无法子哉（口宛）！原来搭个翠凤商量，借几百洋钱用用，陆里晓得个翠凤定归勿借；跑仔好几埭，俚倒定归回报我无拨。我想耐翠凤小个辰光，梳头缠脚才是我，出理耐到故歇，总当耐是亲生囡仵，耐倒实概无良心！我第一转开口，耐就一点情面才无拨，故末气得来要死。今朝我也匆说哉，有心要拿俚个赎身文书难难俚。拿着仔俚赎身文书末，喊俚转来，原搭我做生意。俚倘然再要赎身末，定归要一万洋钱哚。再勿靠帐拿差仔，勿是个赎身文书，倒拿仔罗老爷个拜匣。罗老爷是再要好也无拨，生意浪末照应仔倪几几花花，就是小个场花也幸亏罗老爷十块廿块借拨我用。我匆像是翠凤个无良心，时常来里牵记个罗老爷。坎坎晓得是罗老爷个拜匣，我就忙煞个要送得来。不过我再来里想，翠凤搭仔罗老爷赛过是一个人，罗老爷个拜匣赛过是翠凤个拜匣。我末气匆过个翠凤，要借罗老爷个拜匣押来里，教翠凤拿一万洋钱来赎得去。等翠凤一万洋钱拿仔来，我就拿拜匣送还拨罗老爷。耐转去搭罗老爷说，教罗老爷放心末哉。”